【新Mercurial:Mercurial Vapor 13 Elite AG 實測】@屎波裝備多 HKFOOTBALLREVIEW

截錄自 https://www.instagram.com/p/B6klGhDFAAv/ 已獲授權轉載

【新Mercurial:Mercurial Vapor 13 Elite AG 實測】

作為傳統速度型波Boot,Mercurial今年亦踏入第21年,當年創新輕巧型合成皮設計,現時亦進入咗新嘅時代。今年度,Mercurial升級至新一代,Mercurial作為一剔最受歡迎嘅波Boot,亦有唔少頂級球星代言,包括C朗,夏薩特及尼馬,今次阿靴就當然要同大家實測喱對頂級波boot,至於新Mercurial,佢同樣推出咗高筒Superfly同無筒vapor版本,而今次實測嘅,就會係頂級版無筒版本Vapor 13 Elite,至於用色上,就更加係尼馬最近嘅個人版本。
Vapor 13 Elite鞋面係同樣用上Flyknit質料,今次Mercurial所用嘅Flyknit用係一格格嘅織布質料,再配以薄薄嘅塗層,整體質料會比12代會厚點點,不過Vapor 13 Elite鞋面本身已經相當薄。Vapor 13 Elite質感較上代柔軟,鞋面織布帶來凹凸紋理,亦有少量啜身質感。Vapor 13 Elite一於既往屬於無鞋舌設計,取而代之用上富彈性襪套,配以有鞋帶設計,期望令波Boot更為包腳。鞋釘上則為兩件式設計,今次阿靴所實測嘅更加係適合仿真草嘅AG釘底。

阿靴除了實測外,亦用Vapor 13 Elite踢過數場友賽,最滿意嘅係Vapor 13 Elite嘅速度感及靈活度。Vapor 13 Elite屬於輕巧類別,波Boot鞋型較為修腳,加上鞋面薄及包腳感強,友賽時帶來較強勁嘅速度感及靈敏度。鞋釘雖然大部分釘粒均為圓釘,但另外亦有三粒箭嘴釘,加強到Vapor 13 Elite於仿真草場上嘅抓地力及爆發力。
不得不提嘅係,阿靴非常喜歡Vapor 13 Elite嘅新鞋面質感,就如之前所說,Vapor 12 Elite質感會有點硬,但Vapor 13 Elite就變得較柔軟,亦令踢球球感更為提升。於控球層面上,阿靴認為Vapor 13 Elite帶來不錯嘅赤足體驗,加上Flyknit一格格凹凸紋理,以及少量啜身嘅質感,控球質感相當不錯,可以較輕鬆控下皮球。
阿靴亦喜歡Vapor 13 Elite嘅傳送質感,因為鞋面較薄嘅關係,質感會傾向爽朗,傳球路線亦屬於穩定。至於長傳上,基於Vapor 13 Elite鞋面較薄嘅關係,長傳會因波Boot貼腳而變得更富力量,因此阿靴非常Vapor 13 Elite帶來低高度嘅長傳,長傳質感會非常去。至於穩定度上,Vapor 13 Elite嘅發揮也算不錯,不過阿靴認為袋鼠皮波Boot嘅長傳穩定度會較強,但於合成皮波Boot嚟講,Vapor 13 Elite於長傳上已經屬於相當高嘅水平。
至於射門上,阿靴認為Vapor 13 Elite係需要時間調節嘅波Boot,原因係鞋面質感的確太薄,如果用以往嘅射門力量駕馭,射門會較易偏離目標。阿靴嘗試調低射門力量,射門狀況則大為改善,較漂嘅腳面射門亦能較容易做到,阿靴對此感到非常驚喜。至於腳內檔射門上,鞋面Flyknit凹凸紋理,加上少量啜身嘅質感,不用太強嘅力量,就能做出具曲線嘅射門,加上貼腳嘅用料,射門也相當急勁。
Vapor 13 Elite的確係一對唔錯嘅速度型波Boot,不過佢亦有需要改善嘅地方。阿靴認為Vapor 13 Elite嘅Lockdown屬於一般,原因佢鞋踭位置嘅海綿用料較薄,亦令腳踭位置嘅Lockdown稍微削弱。此外,Vapor 13 Elite鞋頭雖然相對舊時闊,但係鞋身位置會比較修腳,初作比賽時腳掌兩邊會有少量不適,不過過了一段短時間後,狀況就有所改善。另外,Vapor 13 Elite鞋面較薄,亦令波Boot保護度變得較弱,不過喱點亦都係好多速度型波Boot遇到嘅問題。
至於Size上,阿靴平時着開US8,Vapor 13 Elite著返US8就啱啱好,鞋型上,阿靴認為窄至中腳型嘅波友會較為合適。至於鞋釘上,Vapor 13 Elite 嘅AG釘會較為合適中至高質素嘅仿真草場。

Mercurial Vapor 13 Elite AG實測報告:
盤球:●●●●●
控球:●●●●
短傳:●●●●
長傳:●●●●
射門:●●●●◐
舒適:●●●◐
保護:●●●