無鞋帶袋鼠皮波Boot:COPA 19+ FG 實測

再次同大家講講,因為近來有更重要的事情需要關注,「屎波裝備多」這段時間只會有限度運作。
上年度,三間推出了非常創新嘅COPA 19系列。較早之前阿靴就同大家深入分析佢嘅有鞋帶版本COPA 19.1,佢嘅特製袋鼠皮的確令人感到驚喜。而今次,阿靴就同大家認真實測COPA19 嘅無鞋帶頂級版本:COPA 19+ FG,一對外形非常獨特嘅波Boot,而喱對無鞋帶波Boot,現時就有阿根廷前鋒戴巴拿,以及葡萄牙新星祖奧菲歷斯於比賽著上。
COPA 19+ FG鞋面同樣用上特製袋鼠皮,袋鼠皮係無車線設計,同時可以減低袋鼠皮吸水嘅程度。袋鼠皮上面有一條條紋理,形成咗一個接近臘腸卷嘅形狀,此外COPA 19+ FG鞋面亦經過特別處理,會感受到鞋面有少量啜身的感覺,讓袋鼠皮嘅鞋面球感得以提升,同時期望令波Boot更為貼腳。
COPA 19+ FG另外一個位置係佢無鞋帶設計,取而代之嘅係Primeknit織布質料,並配以襪套式設計,設計令鞋面觸球面積更大及整潔。此外,與COPA 19.1一樣,波Boot鞋釘位置用上較柔軟嘅膠質材料,期望提供到適量嘅緩震效果。
先講穿著嘅感覺,COPA 19+ FG鞋頭位置較闊,腳背位置則較緊,始終無鞋帶波Boot通常都要依賴較緊嘅質料取替鞋帶,令波Boot可以與腳掌連繫得更穩定。坦白講,阿靴响第一次著COPA 19+ FG時候,無鞋帶位置的確包得太緊,腳底位置會覺得唔舒服。不過又估唔到嘅,於第二場比賽開始,COPA 19+ FG有明顯嘅唔同,波Boot同腳開始變得融入,而且已經無一開始咁緊嘅狀況,腳掌亦無唔舒服嘅狀況。
响整個實測層面上,阿靴最喜歡嘅係COPA 19+ FG帶來嘅觸球球感,袋鼠皮質料有少量厚度,加上臘腸卷式設計,以及特製鞋面小量啜身,為觸控層面帶來另一種優質體驗。此外COPA 19+ FG係一個無鞋帶設計,阿靴認為佢觸控層面相比COPA 19.1更為優勝,畢竟無鞋帶設計令觸球面積更大,也令控球變得更穩定。
於長短傳的發揮上,阿靴認為發揮跟COPA 19.1相當接近,長傳的質感富力量,加上袋鼠皮提供到傳統優質球感,發揮非常理想,質感亦會隨時間而提昇。至於短傳層面上,阿靴則認為與COPA19.1同樣屬於中等水平。
盤球層面上,COPA19+ 的鞋身設計較貼腳,靈活度亦會相對COPA19.1較好,不過始終波Boot具一定重量,速度感不算強烈。不過再次不得不提嘅係,COPA19+嘅鞋墊舒適,再配以有緩震功能嘅鞋釘,腳底嘅感覺會係幾舒服。

射門上COPA 19+ 發揮相當理想,COPA 19+富一定重量,重量質感亦令射門變得更食力。此外,COPA 19+無鞋帶設計令鞋面觸球位置更整潔,亦可以更容易射出具力量嘅漂波。阿靴亦非常滿意COPA19+ 嘅腳內檔射門,COPA19+ 鞋外層提供到適中嘅「啜身」質感,腳內檔的射門球感不錯外,亦會有較明顯嘅弧度。
總括黎講,COPA19+ 係一對需要時間時間適應嘅波Boot,尤其係穿着嘅初期,腳底位置的確會有唔舒服嘅狀況出現,始終無鞋帶位置包得較緊,所以,阿靴會建議各位換新Boot嘅話,唔好咁快就唔要對舊Boot,平時帶定對舊Boot,隨時作更換。不過以阿靴嘅經驗係,第二及三次著就問題不大。
至於鞋型上,阿靴會覺得佢鞋身窄不過鞋頭較闊,中腳型嘅波友會較合適。至於闊腳嘅波友,阿靴就建議揀返COPA 19.1,畢竟佢鞋身同樣係較闊。Size上阿靴就認為著翻正常Size會較為合適。
COPA 19.1 FG 實測報告:
盤球:●●●◐
控球:●●●●◐
短傳:●●●◐
長傳:●●●●◐
射門:●●●●◐
舒適:●●●◐
保護:●●●●

SOURCE https://www.instagram.com/p/B39LGYBFgIM/