石地神鞋? Lunar Gato 2 IC 實測

2013年,一剔開展了FC247系列,推出咗三對非常出色嘅街場波Boot,其中一對正正是當時好評如潮,由當時剛冒起嘅巴西球員尼馬代言嘅波Boot:Lunar Gato 2💥。Lunar Gato 2當時响香港非常風靡,加上當時平底波Boot選擇不多,以及普遍波Boot質量唔夠現時好,街場上總會有唔少波友會著上佢😌。
今年度,Lunar Gato 2正式重臨,質量上基本同2013年嘅狀況係一樣,同樣嘅科技,同樣嘅質素。於六年後嘅今日,佢同樣會係一對「神鞋」?🤔今日阿靴會同大家深入實測,話俾大家聽個答案。

Lunar Gato 2鞋面用上羊仔皮,皮革質感上接近袋鼠皮般軟熟,但阿靴認為袋鼠皮會再軟熟少少。羊仔皮用上傳統交叉車線,目的係減低鞋面羊仔皮因踢波時經常移動而過份拉扯,影響波Boot原有嘅鞋型👍。羊仔皮覆蓋面算廣,腳內側範圍基本上都係羊仔皮質料嚟。鞋頭位置會有砂質嘅保護塗層,期望提升波Boot耐用程度外,也可以加強踢球上嘅摩擦力💥。
至於Lunar Gato 2嘅鞋後外側,波Boot用上Hyperfuse科技,佢係一層非常輕同薄而且透氣嘅質料,質料可以提供一定散熱功能外,亦大大減低咗Lunar Gato 2嘅整體重量👏🏻。鞋籠位置就以網狀質料為主,鞋踭位置亦用上有少量麂皮,期望減低足部於鞋內移位嘅狀況。緩震層面上,波Boot叫得做Lunar Gato,佢緩震用上當時已非常出色嘅Lunarlon科技,阿靴就一直對Lunarlon嘅波Boot應用上感到非常滿意👍。
响整個實測過程上,阿靴最滿意嘅係Lunar Gato 2嘅球感,羊仔皮質感熟柔軟,加上羊仔皮革上有少量啜身,傳控球球感嘅質感的確非常理想😉。無論鞋短傳定係將長傳嘅控球,阿靴會認為發揮算是頂級,可以更得心應手咁控去自己期望嘅位置。
阿靴亦非常滿意Lunar Gato 2帶嚟嘅短傳質素,腳內檔大範圍嘅羊仔皮質料令傳送變得更穩定,一些中長度嘅傳球也會相當理想,始終軟熟羊仔皮大大提升到傳送嘅球感🤙🏻。長傳發揮上阿靴就認為屬於中上,羊仔皮質料令長傳更順暢,不過阿靴認為皮革太柔軟亦會有唔好嘅地方,就係長傳力量層面上會較弱🤦🏽‍♂️。
Lunar Gato 2於靈活層面也屬理想,整對波Boot嘅用料令重量大減,阿靴就咁拎上手時就已經覺得波Boot屬輕巧😯,加上佢腳前掌鞋底靈活型嘅設計,盤扭層面上嘅觸感亦算靈敏。

射門上阿靴會認為係Lunar Gato 2較弱嘅位置,不過前提係佢其他位置嘅發揮相當完善🙈。阿靴射門上會喜歡較硬嘅質料,始終射門層面講求食力。Lunar Gato 2嘅軟熟羊仔皮質料的確帶來舒適,但同時會較難做到一啲無旋嘅飄波,不過隨著時間開鞋,射門嘅質素係會有所改善😀。另一方面,阿靴會幾滿意腳內檔嘅射門,畢竟羊仔皮帶來優質球感,Chok落去嘅射門相當得心應手,可以較輕鬆Chok往目的地。
耐用性係Lunar Gato 2可能會面對嘅問題😉,阿靴响短短嘅實測過程中就冇遇到咩大問題,不過有部份用家就曾表示Lunar Gato 2會較其他波Boot易受損,當中包括腳趾位置和外邊位置,實則狀況,就有待大家分享,以及等阿靴再踢多一段時間😎。
至於鞋型上,阿靴認為Lunar Gato 2係屬於中腳型,不過基於羊仔皮會隨時間與腳融入,中至闊腳嘅波友都會合適👌。至於Size上,阿靴平時著開US8,Lunar Gato 2著翻US8就可以,波Boot並無偏大或偏細嘅狀況。.
Lunar Gato 2 IC實測報告:
盤球:●●●●
控球:●●●●◐
短傳:●●●●◐
長傳:●●●◐
射門:●●●◐
靈活:●●●●
避震:●●●●●

SOURCE 屎波裝備多 https://www.instagram.com/p/BzfTORgFXEk/

廣告