簡單優化:Copa 20+ FG 實測 @屎波裝備多 HKFOOTBALLREVIEW

截錄自 https://www.instagram.com/p/B7YD27DFbg7/ 已獲授權轉載

【簡單優化:Copa 20+ FG 實測】

Copa就晌今年年尾由19升級至20,一如之前所講,現時三間波boot隔兩代先會徹底換一換樣,而佢新嘅版本只會微調同優化上代嘅波boot,Copa 19就由Copa 18徹底革新,頂級版無鞋帶袋鼠皮再加上無車線設計,令阿靴感到非常之創新,同時顯出三間於科技同傳統嘅結合走晌非常前嘅位置。而今次,Copa 20嘅推出,目的係優化上代嘅設計。Copa係阿靴非常喜歡嘅一個系列,今次亦會大家深入講解同實測無鞋帶頂級版波boot: Copa 20+ FG。

Copa 20+同19+外貌非常接近,同樣係臘腸卷式設計。鞋面大部位置用上袋鼠皮,袋鼠皮質料同19+非常接近,同時經過特別設計,袋鼠皮唔會易入水,摸落去亦會有點啜身嘅質感,而優化嘅位置係,Copa 20+鞋面加添咗一啲曲線嘅紋理,除咗令外表更為特別外,紋理上亦帶來額外質感,期望更為提昇鞋面嘅踢球球感。Copa 20+另外一個優化其位置係响腳內檔嘅三間標誌,於上代的19+,三間標誌只係簡單燙於鞋嘅內檔位置,質感亦夠薄及滑,感覺會有啲似貼紙,不過於Copa 20+,三間標誌用上較厚嘅質料,質感有點啜身,期望增強觸球球感外,亦令波Boot變得更高貴。
其他位置上,Copa 20+同樣用上無鞋帶襪套式設計,原有鞋帶位置轉為富彈性襪套,鞋墊及鞋釘均有緩震功能,鞋釘形狀同樣跟上代一樣,用上半月型釘。另外一個優化嘅位置係响鞋尾嘅位置,於鞋尾嘅最高點,上個系列用上普通膠紙,而於今代,佢刻意加上了一小部分嘅布料,相信為咗減低刮腳嘅可能性,縱然阿靴响實測Copa 19+時並無刮腳嘅狀況。

於整個實測上面,無可否認,阿靴最滿意嘅仍然係Copa 20+嘅控球質感,就如19+嘅測試上,軟熟嘅袋鼠皮,科技性嘅蠟腸卷式無車線設計,配以少量啜身嘅鞋面,本身配置已經令控球質感非常優質,再加上新一代富藝術性嘅鞋面曲線紋理,令鞋面球感再作昇華,亦令成對波Boot更加靚仔。此外,阿靴也非常喜歡Copa 20+內檔三間標誌嘅質感,佢嘅硬度以及啜身質感,均令腳內檔控球質感再加完善。
縱然Copa 20+整體發揮頂級,但亦有唔完美嘅地方。盤扭發揮會係Copa 20+ 較弱嘅位置,雖然Copa 20+無鞋帶設計令鞋型更貼腳,但Copa 20+較重,加上袋鼠皮於急停轉方向時會卸走少量力量,帶來嘅速度感及靈活度會相對較弱。此外,Copa 20+頂級版本只得FG真草版本,於較草質差嘅仿真草就未能大派用場,喱點係較為可惜嘅地方。

於短傳層面上,阿靴認為發揮屬於中上,袋鼠皮質料配以臘腸卷式無車線設計,加上腳內檔優化嘅三間斜紋,傳球路線會較穩定,而且球感不錯。阿靴更為喜歡Copa 20+嘅長傳體驗,跟Copa 19+一樣,經特別設計嘅袋鼠皮縱然摸落較厚,但係唔會減低到波Boot帶嚟嘅力量感,相反,特製袋鼠皮,加上Copa 20+較重,長傳力量充裕,而且袋鼠皮帶來嘅傳統交感同時兼備,整體發揮相當理想。
阿靴對Copa 20+嘅射門發揮同樣感到滿意,腳面射門力量感充裕,加上無鞋帶設計令鞋面更整潔,射門球感亦變得更好,亦更容易作出「食得應」嘅腳面射門。阿靴亦非常滿意Copa 20+帶來嘅腳內檔射門,Copa 20+鞋面少量啜身,加上傳統袋鼠皮質感,可以較容易做出既具弧度及準繩嘅腳內側射門。

話說於上次於Copa 19+嘅實測,阿靴遇到一個毛病,就係無鞋帶位置包得較緊,於初期足弓位置感到唔舒服。今次Copa 20+阿靴就認為有唔錯嘅改善,無鞋帶位置嘅包腳感適中,於初期並無不適嘅狀況,喱點的確令阿靴感滿意。
鞋型上,跟Copa 19+一樣,Copa 20+會較合適中腳型嘅波友,畢竟無鞋帶設計未必合適種種腳型。如果腳較闊但又想享受Copa嘅袋鼠皮質感,阿靴就認為可以考慮一下Copa 20.1有鞋帶頂級版本。至於尺碼上,啊靴平時着開US8,Copa 20+著翻US8就非常合適。

COPA 20+ FG 實測報告:
盤球:●●●◐
控球:●●●●◐
短傳:●●●●
長傳:●●●●◐
射門:●●●●◐
舒適:●●●●
保護:●●●●