可調節鞋帶波boot:Future 4.1 Netfit FG/AG 實測

Puma嘅波Boot科技一直不斷更新,2017年,Puma開發咗Future系列,多個鞋帶窿嘅設計,期望迎合唔同腳型嘅波友。當年阿靴亦同大家開過箱,簡單同大家解構吓佢。Puma Future 不斷進化,短時間内推出咗多款Future系列,包括2.1,19.1同4.1;於最近,Future更加推出至5.1。
Future系列升級相當頻密,不過主要嚟講,變動嘅位置係鞋面嘅質料,而今次,啊靴就會同大家實測其中嘅一對Future波Boot:Future 4.1 Netfit FG/AG,配色就用上非常鮮艷嘅黃色。
Future 4.1 鞋面織布質料EvoKNIT Pro,鞋面上有一粒粒突起嘅紋理,紋理凸出位置有一定厚度及硬度。此外,Future 4.1 亦配以自家開發嘅Netfit科技,Netfit科技令鞋兩邊充滿著鞋帶窿,俾大家根據自己腳型配以相應嘅綁鞋帶方法,阿靴傾向中腳型,本身嘅鞋帶配置就已經非常合適。Future 4.1 同樣係襪套式設計,襪套為中高度,令足部與波Boot變得更貼服。鞋釘上,佢用上FG/AG兩用釘,鞋釘主要為圓釘,鞋中間亦有四粒刀形釘組成,Puma就更加講到釘底係以速度為主打。
於整個實測上,意想不到地,阿靴最滿意嘅係Future 4.1帶來嘅力量感,受惠於鞋面較硬嘅凹凸紋理,無論於射門還是長傳,力量亦會較一般波Boot強。而阿靴亦非常滿意Future 4.1嘅長傳體驗,除咗力量更加去之外,鞋面凹凸紋帶來嘅長傳球感亦非常之優質,亦可以較輕鬆做到一啲較柔嘅長傳。
腳面射門亦係阿靴相當滿意嘅位置,由於波Boot力量感強,亦令射門相當之去,會較容易射到較漂嘅波,質感傾向急勁。至於腳內檔射門上,阿靴認為波Boot鞋頭位置帶來理想嘅摩擦力,腳內檔射門球感算不錯,亦帶來更具弧度嘅射門。
可惜嘅係,Future 4.1 鞋面凹凸紋具一定厚度,亦相對舊時嘅Future 2.1系列較厚及硬,阿靴認為新設計的確會令觸感相對Future 2.1或之前版本較遜色,對於喜歡赤足球感嘅波友嚟講,呢一點的確要留意。不過較厚嘅鞋面亦有佢嘅好處,例如Future 4.1嘅保護性亦會較強。
於短傳上,阿靴則認為發揮屬於中間水平,並不算突出,控球質感則屬於中上,鞋面具厚度嘅凹凸紋理帶來更大嘅觸球面積,提昇控球嘅質感,阿靴亦滿意長傳嘅控球質感,畢竟較厚嘅凹凸紋理提升到波Boot嘅控球球感,無論腳內檔或是腳面控球,質素屬於理想,可以較輕鬆控去期望嘅位置。
盤扭層面上,Future 4.1 嘅Netfit科技令波Boot可以根據大家腳型,而制定相應嘅綁鞋帶方法,加上襪套式嘅設計,Future 4.1嘅包腳質感相當充裕,Lockdown亦非常唔錯,不過美中不足嘅位置係,畢竟Future 4.1鞋面較厚,靈活層面則有所削弱。
至於鞋釘上,Future 4.1用上嘅係FG/AG兩用釘,真草嘅球場的確合適,於仿真草場上,中至高質嘅仿草也算合適。Future 4.1 前腳掌鞋釘會較後踭位置長,為波Boot帶來更強嘅爆發力。至於响質素較差嘅仿草地上,阿靴就建議可以選擇MG嘅Puma鞋釘,不過响香港就未必搵到,要靠外國網。

整體黎講,Future 4.1對阿靴嚟講,的確相當感驚喜嘅一對波Boot,畢竟今次係阿靴第一次實測Future系列。波Boot尺碼上,阿靴平時着開US8,Future 4.1揀翻US8可以話係啱啱好,腳型上,Future 4.1 可以話適合大部份腳型嘅波友,喱點係可調節鞋帶設計帶來嘅好處。不過,如果要再仔細啲分,阿靴會認為中至闊腳嘅波友會更為合適,畢竟Future 4.1 鞋頭較為圓和闊。

Future 4.1 Netfit FG/AG 實測報告:
盤球:●●●◐
控球:●●●●
短傳:●●●◐
長傳:●●●●●
射門:●●●●◐
舒適:●●●●
保護:●●●●◐