Monarcida 2 Neo MIJ 實測

Rebula,Morelia Neo,Morelia,都係Mizuno波Boot熟悉嘅名字,佢哋用上頂級嘅袋鼠皮,亦配以唔同嘅設計,為帶來帶來唔同嘅選擇。除咗三大系列,話說Mizuno旗下亦有其他波Boot款式,當中就包括Monarcida Neo。Monarcida Neo係2015年嘅產物,代替當年停產嘅Estrella Neo,Monarcida Neo而家就更加出到第二代。
Monarcida 2 Neo 定價相對三大系列波Boot便宜,但同樣擁有Made In Japan嘅優質證明,配以袋鼠皮質料,佢嘅發揮又會係點?阿靴先响度感謝 @Hansttisoccer 提供嘅波Boot,令阿靴可以同大家深入分析喱對Mizuno波Boot。

Monarcida 2 Neo 鞋前身用上袋鼠皮,亦沿用傳統車線,減低袋鼠皮因過到拉扯而變型嘅狀態,Monarcida 2 Neo 嘅車線較其他鞋款有少許唔同,佢係不對稱嘅設計,Mizuno就表示設計可更有效減低鞋外側變型嘅狀況。Monarcida 2 Neo 鞋頭及兩側位置均用上磨砂塗層,期望俾到大家傳統球感外,亦可以加強波Boot嘅耐用程度。鞋後身位置上,Monarcida Neo 2 就用上超纖合成皮,質料會較硬。至於鞋釘上,Monarcida 2 Neo 用上Mizuno常見嘅HG釘底,以12粒圓釘平衡組成,鞋前掌中間位置亦有一粒常見嘅特製釘,期望提升向前加速嘅發揮。

於整個實測過程上,阿靴最滿意嘅係Monarcida 2 Neo 帶來嘅舒適度。阿靴現時主要都係踢跑馬地足球場,仿真草質素屬於中至高級別,Monarcida 2 Neo 嘅HG釘正正合適,一來HG定鞋釘不算長,可以剛好插進入仿草內,二來HG釘成圓形狀而且平衡分配,可以減少關節位置於轉向時嘅受壓。此外,阿靴認為Monarcida 2 Neo 鞋型較闊,腳掌唔會有太迫夾嘅感覺,加上鞋頭位置用上袋鼠皮,質料柔軟亦提升到整體波Boot嘅舒適度。
觸控層面於Monarcida 2 Neo 身上亦有唔錯嘅發揮,鞋頭用上嘅係軟熟嘅袋鼠皮,可以提升觸控嘅球感,可以較輕鬆將波控响自己期望嘅位置。阿靴認為Monarcida 2 Neo 觸控整體發揮屬於中上,不過相比較頂級嘅Morelia 2 Neo,阿靴認為Monarcida 2 Neo 會差點點,畢竟Morelia 2 Neo 整體鞋身會更柔軟及貼腳。
於短傳上,Monarcida 2 Neo 發揮屬於中上,鞋前身的袋鼠皮的確可以提升短傳球感,美中不足嘅係波Boot鞋後身位置用上較硬嘅合成皮,亦減低了腳內檔短傳嘅質感。至於將長傳上,袋鼠皮質料帶給大家傳統的球感,阿靴認為力量感是足夠,而隨著時間去,Monarcida 2 Neo 帶來嘅長傳質感亦會不斷提升,畢竟袋鼠皮波Boot是隨著時間會變得更好著。
Monarcida 2 Neo 盤扭上的發揮屬於一般,以袋鼠皮波Boot來說,Monarcida 2 Neo 屬於較輕巧嘅類別,加上HG釘長度適中,帶來嘅速度感屬於理想。不過阿靴屬於中腳型,則會略嫌Monarcida 2 Neo 不算貼服,亦令波Boot靈活感變得較弱。
射門層面上阿靴認為Monarcida 2 Neo 發揮同樣屬於一般,畢竟對阿靴來說,Monarcida 2 Neo 包腳感不算強,亦令射門較難射到較漂嘅波,力量層面上屬於中等水平。不過阿靴則較喜歡Monarcida 2 Neo 腳內檔嘅射門,波Boot鞋面帶來充裕嘅摩擦力,加上鞋前身位置用上袋鼠皮,腳內檔射門嘅球感相當理想。
整體嚟講,阿靴認為Monarcida 2 Neo 屬於一對中階嘅袋鼠皮波Boot,佢亦會隨著時間去變得更加好踢。當大家又想一試Made In Japan嘅袋鼠皮波Boot,但又唔想負擔較昂貴嘅入場費,Monarcida 2 Neo 會係一個唔錯嘅選擇。至於鞋型上,Monarcida 2 Neo 屬於中至闊腳,尺碼上阿靴以往著開US8,Monarcida 2 Neo 著翻US8就啱啱好。
Monarcida 2 Neo MIJ實測報告:
盤球:●●●
控球:●●●●
短傳:●●●◐
長傳:●●●●
射門:●●●
舒適:●●●●◐
保護:●●●●◐ .